सौ.राजश्रीताई मखरे पुन्हा एकदा प्रभाग क्रमांक १० मधून इच्छुक !
इंदापूर (प्रतिनिधी) – इंदापूर नगरपरिषदेच्या आगामी निवडणुकीत प्रभाग क्रमांक १० मधील अनुसूचित जातीसाठी राखीव जागेवरून समाजसेविका सौ. राजश्री मखरे यांनी निवडणूक लढविण्याची इच्छुकता व्यक्त केली आहे.
प्रभागात गेल्या काही वर्षांत विविध विकासकामांमध्ये त्यांचा सहभाग राहिल्याची माहिती स्थानिक सूत्रांनी दिली. शहरातील काही कुटुंबांना रमाई घरकुल आवास योजना आणि प्रधानमंत्री आवास योजनेचा लाभ मिळवून देण्यासाठी प्रयत्न करण्यात आले. दीडशे कुटुंबांना रमाई घरकुल आवास योजनेचा लाभ मिळवून दिल्याचे त्यांनी सांगितले तसेच काही घरांना नळजोडणीसंबंधी सवलत मिळवून देण्यात पुढाकार घेतल्याचे सांगितले जाते.
२०२१ मध्ये “लोकशाहीर अण्णाभाऊ साठे दलित वस्ती नागरी सुधारणा योजना” अंतर्गत भुयारी गटार प्रकल्प प्रभागात राबविण्यात आला. या कामासाठी सुमारे १ कोटी ७ लाख रुपयांचा निधी मंजूर झाला होता. स्थानिक प्रशासनाच्या माहितीनुसार, प्रकल्प निश्चित वेळेत पूर्ण झाला असून परिसरातील पावसाळ्यातील जलमयतेची समस्या काही प्रमाणात कमी झाल्याचे नमूद करण्यात आले आहे.
मखरे या स्वयं-सहायता गटांशी संबंधित असून महिलांच्या आर्थिक सक्षमीकरणासाठी काही उपक्रम राबविल्याचेही सांगितले जाते.
प्रभागातील नागरिकांनी निवडणुकीच्या पार्श्वभूमीवर विविध उमेदवारांविषयी चर्चा सुरू केली आहे. मखरे यांच्या इच्छुकतेच्या घोषणेमुळे स्थानिक राजकीय घडामोडींना वेग आला आहे.
